Desde Vella Escola presentamos unha nova edición do programa “FALAMOS? Rap e Saúde Mental” consistente en talleres participativos de Rap, faladoiros e mesas de debate dirixidas á mocidade.
Esta edición do programa conta coa axuda da Xunta de Galicia a través das subvencións destinadas a realizar programas de interese xeral para fins de carácter social con cargo á asignación tributaria do 0,7% do imposto sobre a renda das persoas físicas e do imposto de sociedades a través da Orde do 5 de setembro de 2024 da Consellería de Cultura, Lingua e Xuventude.
Este programa desenvolverase durante 2025 en centros educativos (últimos cursos de primaria, toda a ESO e bacharelato) e centros xuvenís e culturais públicos de diferentes municipios da comunidade autónoma de Galicia.
Os contidos do programa serán os seguintes:
TALLERES DE RAP
Duración por sesión: 2 horas
Número máximo de participantes: 30
Idades dos/as participantes: 10 a 18 anos.
Contidos do taller de rap:
- Faladoiro para introdución do programa “FALAMOS? – Rap e Saúde Mental”
- Técnicas de escritura creativa e comprensión do ritmo
- Técnicas e recursos literarios e poéticos para a creación de versos (rimas)
- Traballo de creación de letras de rap en equipo (desenvolvemento das temáticas e busca de conceptos)
- Dinámicas de grupo para a creatividade e a improvisación (trabalinguas, xogos de palabras…)
- Elaboración conxunta dun tema de rap de contido social relacionado coas emocións e a saúde mental
FALADOIROS
Duración por sesión: 1 hora
Número máximo de participantes: 50
Idades dos/as participantes: 12 a 30 anos.
Estes tres conceptos son a base dos contidos dos faladoiros e das mesas de debate:
- RESPECTO – A presenza e a empatía. Escoitar e escoitarse, sendo consciente de onde e con quen se está.
- ACTITUDE – Como e desde onde afrontamos a realidade. Como actuamos ante a contorna, superar limitacións, linguaxe non verbal, forza interior.
- FLOW – A nosa identidade. Descubrir e aceptar ou desenvolver as nosas habilidades e peculiaridades ao rapear, recoñecer a nosa unicidade e singularidade como un valor positivo e único que debemos aproveitar para expresar como nos sentimos e o que pensamos dun xeito natural e tamén intelixente.
